الرئيسية
حقائق مذهلة الجمعة مايو 22, 2009 12:41 amابتلاني الله بأن اسكن في حي سكني فيهو حفلات أيام الله السبعة... من العصر
تسمع صوت الساوند سيستم يجربو فيهو... تيست... تيست... ومن حكم الله
أن أهلي الجايين من أرقو ديل معجبون بالأصوات النسائية النشاز... الفنانة تغني في جهة
ومزيكة الاورغ في جهة تانية والدلوكة في جهة تالتة... والغريبة اسمع
نساوين تزعرد وشباب يصفرو ويكوركو فرحاً وطرباً...شئ من حت وهز وشئ من طرب
جماعتي وأهلي ديل يطربو من كلمة هوهو...المهم يعني ديل ناس مبسوطة
أشد الانبساط... مما يجعل المطربة النشاز تتمادى في تعذيبي بصوتها الزي
الزفت وانا راقد فوق عنقريبي في صمة خشمي اشحد في النوم شحدة.. هذا
الاستماع القهري المتواصل للحفلات والمتابعة اللصيقة للأغاني البتقدما
مطربات الاحياء الشعبية جعلني اعرف الـــــ (top ten).. من أغاني الحفلات.
وذلك عن طريق تفاعل المزغردات والمصفرين اثناء الاغنية. وجدت انه ما
زالت أغنية راجل المرا تحافظ على المركز الاول، للشهر التالت على التوالي
بينما جاءت اغنية عوض دكام في المركز التاني، ولكن للأسف تراجعت اغنية
تجي واللا نجي في مطار ابو ظبي الى المركز التاسع، وتقدمت أغنية عزاز
علينا من المركز الستاشر الى المركز العاشر ولكل مجتهد نصيب...
وفي ذات ليلة سوداء منيلة بنيلة، سمعت مغنية شتراء ذات صوت اجش زي
قرار مكين، كما علمت من اهل المزيكا ان الصوت زي القرار هو الصوت
البيطلع من آخر الحلقوم... وهو قوي يعني مرا زي البتغني دي لو نهرتك
وقالت لك «يا راجل أركب عدلك» سوف يركبك الجن وتركب القصبة وتتلحس
من الخلعة والخوف... كانت المطربة ذات القرار المكين تغني وأنا اتخيلت
شكلها، محمرَّة العينين مفتولة العضلات وبالضراع سكين... ولما غنت غنية
راجل المرا حلو حلا، قلت في سري وكلي ثقة قطع شك يكون أحلا منك وأنا
اقصد الفنانة، وعندما غنت اغنية وائل.. «كلو من وائل.. وائل قفل
الموبايل».. وهي تزأر وتنهر... قمت صنقرت في نص العنقريب وكادت
الدموع تنهمر من عيني اشفاقاً على وائل من الراجيهو من صاحبة القرار المكين... وانا اقول «وا سجمك.. و.. وا رمادك يا وائل... اها خُم وصُر... انت الوداك تحب زي دي شنو؟»... ثم واصلت هذه المغنية الارهابية الغنية وهي تقول:-
كلو من بابا
بابا علا البوابا
كلو من حبوبة
حبوبة فسخت الختوبة
ان شاء الله تجيها رطوبة
كلو من جدو
جدو الله يهدو
...علمت وأنا لا يساورني أدنى شك، ان الفنانة دي ناوية نية سوداء، على كلٍّ من يقف في طريق حبها، حتى لو كان وائل ذات نفسو... المغنية تنذر وتحذر في وائل وفي اهلو حتى الحبوبة ما خلتا... وتصيح في الجماهير «يلا صفقو... صفقو... الصفقة وينا يا جماعة؟» واخذت الجماهير تصفق وتزغرد وتصفر... اما انا بقيت اصفق مع المصفقين وانا فوق عنقريبي... خوفاً وجزعاً... وصحت بأعلى صوتي جمرجرة «يسقط وائل... وتسقط حبوبة وائل».
سارة ياسارة
ست اللهيج السُكري
انتي الجمال بتسكري
وجوا القليب بتعسكري
» سلامتك
» تحية وتقدير
» دفتر الحضور والغياب ...
» تهنئـــــــــــــــــــــــــــــة
» شباب كوية
» عمنا ادريس سيد اخبارو
» هلا . . وغلا
» في زمة الله معلمي الفاضل